काठमाडौं। प्रधानमन्त्री केपी शर्मा ओलीले भ्रष्टाचारविरुद्ध आफ्नो सरकारको प्रतिवद्धता नडगमगिएको बताएका छन्।
संविधान तथा राष्ट्रिय दिवसका अवसारमा टुँडिखेलमा भएको विशेष कार्यक्रममार्फत राष्ट्रका नाममा सम्बोधन गर्दै उनले भ्रष्टाचार हुन नदिने र नसहने बताएका हुन् । उनले भ्रष्टाचार गर्न निदने र भ्रष्टाचार विरुद्ध बोल्दा ‘मुखमा पानी नहाल्ने’ पनि उनले बताएका छन् । भ्रष्टाचार विरुद्ध आफ्नो सरकारको प्रतिवद्धता स्पष्ट रहेको उनले बताएका छन् ।
प्रधानमन्त्री ओलीले कोरोना भाइरसको महामारीका कारण सरकारले प्रतिबद्धता अनुसार विकासका काम गर्न नसके पनि अर्थतन्त्र सकारात्मक नै रहेको बताएका छन् । उनले कोभिड–१९ को महामारीका कारण विश्वका अधिकांश देशमा अर्थतन्त्र नरात्मक हुँदा पनि नेपालको अर्थतन्त्र सकारात्मक नै रहेको बताएका हुन् ।
संकटको अवस्थामा पनि विदेशी दातृ निकायको सहयोग प्राप्त हुने क्रम बढेको पनि उनले बताएका छन् । महामारीको अवस्था नभएको भए आफूले अघिल्लो वर्ष गरेका प्रतिवद्धता अनुसारका विकासका काम भइ सक्ने भन्दै उनले रोकिएको विकास वा सुस्त भएको विकास गतिको दोष कोरोना महामारीलाई दिएका छन् ।
उनले लिपुलेक–लिम्पियाधुरा–कालापानीसहितको क्षेत्र समेटिएको नयाँ नक्सा सार्वजनिक गरिएको र त्यसबाट सार्वभौमसत्ताको सुरक्षाका लागि आफ्नो सरकारको प्रतिवद्धतालाई कार्यमा देखाएको बताए । उनले सो कार्यका लागि सांसदहरुलाई पनि बधाई दिए ।
