काठमाडाैँ । राष्ट्रिय स्वतन्त्र पार्टी(रास्वपा)ले भिजिट भिसा प्रकरणमा न्यायिक वा संसदीय छानबिन समितिको माग सहितको विरोध जारी राख्ने निर्णय गरेको छ ।
बुधबार रुपन्देहीको भैरहवामा बसेको संसदीय दलको बैठकले प्रतिनिधिसभामा उठाइरहेको भिजिट भिसाको आवरणमा भइरहेको मानव तस्करी जस्तो सङ्गठित अपराधमा आवश्यक न्यायिक वा संसदीय छानबिन समितिको माग सहितको विरोध जारी राख्ने निर्णय गरेको रास्वपाका प्रवक्ता मनिष झाले बताए ।
सदनमा र संसदीय समितिहरूमा विभिन्न विधेयकहरूमा भइरहेको छलफलमा राष्ट्रिय स्वतन्त्र पार्टीको सहभागिता र थप सक्रियताको बारेमा बैठकबाट छलफल भएको थियो ।
देशभित्र र प्रवासमा सङ्गठनको कार्यक्रमहरूमा रास्वपा सांसदहरूको सहभागिता सक्रियता र उपस्थितिहरूलाई अझै प्रभावकारी बनाउने विषयमा समेत छलफल भएको प्रवक्ता झाले बताए ।
बैठकमा कार्यवाहक सभापति डोल प्रसाद अर्यालले समसामयिक राजनीतिक विषयका साथै भ्रष्टाचारमा व्याप्त मन्त्रीहरू मुछिएको लगायतबारे जानकार दिएका थिए ।
साथै कार्यवाहक सभापति अर्यालले रास्वपाले जारी राखेको हस्ताक्षर सङ्कलन अभियानबारे समेत दलका सदस्यहरूलाई जानकारी गराएका प्रवक्ता झाले बताए ।
बैठकले राष्ट्रिय स्वतन्त्र पार्टी बर्दिया जिल्ला सभापति विपिन पौडेलको सिङ्गापुर भ्रमणको क्रममा भएको निधनप्रति श्रद्धाञ्जली व्यक्त गरेको छ ।
