काठमाडौंका सञ्चारमाध्यम, नेता गगन थापाको निवास र अन्य संवेदनशील स्थान अगाडि शङ्कास्पद रूपमा पार्किङ गरिएका सवारीसाधन सोमबार ट्राफिक प्रहरीले उठाए पनि सामान्य जरिवाना गराएर साँझ सम्बन्धित धनीलाई फिर्ता गरेको छ।
उपत्यका ट्राफिक प्रहरी कार्यालयका अनुसार सवारी तथा यातायात व्यवस्था ऐन, २०४९ अनुसार अनधिकृत पार्किङ गरेको कसुरमा ५०० देखि १,५०० रुपैयाँसम्म जरिवाना गरिएको हो। तर, ती सवारी किन संवेदनशील स्थानमा पार्किङ गरिएका थिए भन्नेबारे सोधपुछ नगरी छाडिएको भन्दै अनुसन्धानको प्रभावकारितामाथि प्रश्न उठेको छ।
नेपाल पत्रकार महासंघले घटनाको निष्पक्ष छानबिनको माग गरेको छ भने जिल्ला प्रहरी परिसर काठमाडौंले अनुसन्धान जारी रहेको जनाएको छ।
यसैबीच, घटनामा प्रयोग भएका सवारीसाधन नै धनीलाई फिर्ता गरिएकाले अनुसन्धान प्रभावित हुन सक्ने भन्दै सरोकारवालाले चिन्ता व्यक्त गरेका छन्।
