नेपाली कांग्रेसले १५औँ महाधिवेशनमा सहभागी हुने क्रियाशील सदस्यहरूको नामावली स्वीकृत गरेको छ ।
आइतबार पार्टी केन्द्रीय कार्यालय सानेपामा बसेको केन्द्रीय कार्यसम्पादन समितिको बैठकले महाधिवेशनमा सहभागी हुने क्रियाशील सदस्यहरूको नामावली स्वीकृत गरेको हो ।
महामन्त्री प्रदीप पौडेलको संयोजकत्वमा गठित ‘सदस्यता व्यवस्थापन केन्द्रीय समिति’ले १५औँ महाधिवेशनमा भाग लिने क्रियाशील सदस्यहरूको नामावली तयार पारी सभापति गगनकुमार थापासमक्ष पेस गरेको थियो ।
नेपाली कांग्रेसको विधान, २०१७ (एघारौँ संशोधनसहित)को धारा ४ को उपधारा (९) बमोजिमको प्रक्रिया पूरा गर्दै सभापति थापाले उक्त नामावली स्वीकृत गर्ने निर्णय गरेका हुन् ।
क्रियाशील सदस्यहरूको नामावली स्वीकृत भएसँगै १५औँ महाधिवेशनमा मताधिकार प्रयोग गर्ने प्रतिनिधि छनोटको आधारसमेत तयार भएको छ ।
पार्टी विधानअनुसार सदस्यता व्यवस्थापनको जिम्मेवारी पाएको समितिले लामो समयदेखि क्रियाशील सदस्यता व्यवस्थापनसम्बन्धी प्रक्रियागत काम गर्दै आएको थियो ।
नामावली स्वीकृत भएपछि कांग्रेसका तल्लो तहका अधिवेशनदेखि १५औँ महाधिवेशनसम्मका अन्य सांगठनिक प्रक्रियाले समेत गति लिने अपेक्षा गरिएको छ ।
