दोस्रो संस्करणको नेपाल प्रिमियर लिग (एनपीएल) अन्तर्गत आज सोमबार आठौँ दिन दुई रोमाञ्चक खेल हुने छन्।
कीर्तिपुरस्थित त्रिवि अन्तर्राष्ट्रिय क्रिकेट रङ्गशालामा हुने पहिलो खेल बिहान ११ः४५ बजे जनकपुर बोल्ट्स र विराटनगर किङ्ग्सबीच हुनेछ। दोस्रो खेल दिउँसो ४ बजे कर्णाली याक्स र सुदूरपश्चिम रोयल्सबीच हुने तय छ।
हालसम्मको अङ्कतालिकामा सुदूरपश्चिम रोयल्स र विराटनगर किङ्ग्स दुवैले दुई–दुई खेलमा चार–चार अङ्क जोड्दै क्रमशः पहिलो र दोस्रो स्थानमा छन्। काठमाडौँ गुर्खाज तीन खेलमा दुई अङ्कसहित तेस्रो स्थानमा छ। पोखरा एभेन्जर्स भने खेलिएका दुवै खेलमा पराजित हुँदै पुछारमा रहेको छ।
मङ्सिर १ गतेदेखि सुरु भएको एनपीएलमा आठ फ्रेन्चाइज टोली — जनकपुर बोल्ट्स, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किङ्ग्स, चितवन राइनोज, काठमाडौँ गुर्खाज र लुम्बिनी लायन्स — प्रतिस्पर्धामा छन्।
प्रतियोगिताको फाइनल मङ्सिर २७ गते हुने छ।
