फिफा विश्वकप २०२६ को दोस्रो सेमिफाइनलमा बिहीबार इङ्गल्यान्ड विरुद्ध अर्जेन्टिनाले २–१ को नाटकीय जित निकालेपछि लियोनेल मेस्सी ‘गोल्डेन बुट’ को दौडमा पुनः शीर्ष स्थानमा फर्किएका छन् । सेमिफाइनल खेलमा उनले व्यक्तिगत गोल गर्न नसके पनि दुई वटा महत्त्वपूर्ण गोलका लागि अवसर (असिस्ट) सिर्जना गरेका थिए ।
यसअघि फ्रान्सका किलियन एम्बाप्पे र मेस्सी समान ८–८ गोलका साथ बराबरीमा रहेका थिए । तर समान गोल भएको अवस्थामा बढी असिस्ट गर्ने खेलाडी अघि रहने फिफाको पहिलो टाइ–ब्रेकर नियम अनुसार ४ असिस्ट गरेका मेस्सी पहिलो स्थानमा उक्लिएका छन् भने ३ असिस्ट गरेका एम्बाप्पे दोस्रो स्थानमा पछि परेका छन् ।
जारी विश्वकपमा ८ गोल गरिसकेका मेस्सीले यस प्रतियोगितामा केही उत्कृष्ट र ऐतिहासिक गोलहरू गरेका छन् । समूह चरणमा अल्जेरिया विरुद्ध उनले आफ्नो विश्वकप करिअरकै पहिलो ऐतिहासिक ह्याट्रिक पूरा गरेका थिए । त्यस्तै समूह चरणकै अर्को खेलमा जोर्डन विरुद्ध लामो दुरीबाट प्रत्यक्ष फ्रिकिकमार्फत गोल गरेका थिए ।
उता, फ्रान्सका किलियन एम्बाप्पे स्पेनसँगको सेमिफाइनल खेलमा आफ्नो टोली २–० ले पराजित हुँदा गोल गर्न असफल रहेका थिए । यद्यपि, तेस्रो स्थानका लागि आगामी आइतबार नेपाली समय अनुसार बिहान २ः४५ बजे मियामीमा इङ्गल्यान्ड विरुद्ध हुने प्ले–अफ खेलमा एम्बाप्पेलाई आफ्नो गोल सङ्ख्या थप्ने अझै एक अवसर बाँकी छ । सोही खेलमा इङ्गल्यान्डका ह्यारी केन र जुड बेलिङ्घम पनि मैदानमा उत्रिनेछन्, जो हाल समान ६–६ गोल र १–१ असिस्टका साथ गोल्डेन बुटको दौडमा कायम छन् । नर्वेका ७ गोलकर्ता अर्लिङ हालान्ड भने क्वार्टरफाइनलबाटै टोली बाहिरिएसँगै यस दौडबाट बाहिर भइसकेका छन् ।
अर्जेन्टिनाका लियोनेल मेस्सीले भने आगामी आइतबार न्यूयोर्क–न्युजर्सी स्टेडियममा स्पेन विरुद्ध हुने विश्वकपको फाइनल खेलमा आफ्नो चुनौती प्रस्तुत गर्नेछन् । यस निर्णायक फाइनल खेल र तेस्रो स्थानका लागि फ्रान्स र इङ्गल्यान्डबिच हुने खेलको नतिजाले नै यस वर्षको प्रतिष्ठित गोल्डेन बुट विजेताको टुङ्गो लगाउनेछ ।
