फिफा विश्वकप २०२६ को दोस्रो सेमिफाइनलमा अर्जेन्टिनाले इङ्ग्ल्यान्डलाई २–१ ले पराजित गर्दै लगातार दोस्रो पटक विश्वकपको फाइनलमा स्थान सुरक्षित गरेको छ।
नेपाली समयअनुसार बिहीबार बिहान भएको रोमाञ्चक प्रतिस्पर्धामा एक गोलले पछि परेको अवस्था उल्टाउँदै अर्जेन्टिनाले पुनरागमन जित दर्ता गरेको हो। अब अर्जेन्टिनाले आगामी आइतबार हुने फाइनलमा स्पेनसँग उपाधिका लागि प्रतिस्पर्धा गर्नेछ।
पहिलो हाफ निकै प्रतिस्पर्धात्मक रह्यो। दुवै टोलीले आक्रामक खेल प्रस्तुत गर्दा पहिलो ४५ मिनेटमै १९ वटा फाउल भए। अर्जेन्टिनाले १२ र इङ्ग्ल्यान्डले ७ फाउल गरेका थिए भने दुवै टोलीका एक–एक खेलाडीले पहेँलो कार्ड पनि बेहोरे। यद्यपि पहिलो हाफ गोलरहित बराबरीमा सकिएको थियो।
दोस्रो हाफको ५५औँ मिनेटमा एन्थोनी गोर्डनले उत्कृष्ट गोल गर्दै इङ्ग्ल्यान्डलाई १–० को अग्रता दिलाएपछि अर्जेन्टिना दबाबमा परेको थियो। तर खेलको अन्तिम समयमा अर्जेन्टिनाले शानदार पुनरागमन गर्यो।
खेलको ८५औँ मिनेटमा एन्जो फर्नान्डेजले बराबरी गोल गर्दै अर्जेन्टिनालाई खेलमा फर्काए। त्यसपछि खेल अतिरिक्त समयमा जाने संकेत देखिइरहेका बेला इन्जुरी टाइमको दोस्रो मिनेट (९०+२) मा लाउटारो मार्टिनेजले निर्णायक गोल गर्दै अर्जेन्टिनालाई २–१ को जित दिलाए।
यस जितसँगै लियोनेल मेस्सीको कप्तानीमा रहेको अर्जेन्टिना लगातार दोस्रो विश्वकप उपाधि जित्ने अभियानबाट एक कदम मात्र टाढा पुगेको छ। अर्कोतर्फ, ६० वर्षपछि पहिलो पटक विश्वकप फाइनल पुग्ने इङ्ग्ल्यान्डको सपना सेमिफाइनलमै समाप्त भएको छ।
