ब्राजिलविरुद्ध अर्जेन्टिना : नेयमार र मेस्सीमध्ये कसको सपना पूरा हाेला ?

अर्जेन्टिनाको जर्सीमा मेस्सीको पाँचौ फाइनल

  • Published Date : 2021-07-10
  • nepaltale.com

एजेन्सी। विश्व फुटबलकै सर्वकालीन महान खेलाडीमध्यका अर्जेन्टिनी फरवार्ड लिओनेल मेस्सीले हालसम्म राष्ट्रिय टोलीका लागि कुनै उपाधि जितेका छैनन् । शनिबार कोपा अमेरिकाको फाइनलमा ब्राजिलको सामना गर्दा मेस्सीसँग त्यो खडेरी तोड्ने अवसर छ ।

कोपा अमेरिकाको फाइनलमा पछिल्लो पटक ब्राजिल र अर्जेन्टिनाले सन् २००७ मा भिडेका थिए । त्यसबेला ब्राजिलले ३-० को सहज जित दर्ता गर्दै उपाधि आफ्नो पक्षमा पारेको थियो । यसपटक दुवै टोली प्रतियोगितामा अपराजित रहँदै फाइनल प्रवेश गरेका छन् । फाइनल निकै रोमान्चक हुने अपेक्षा गरिएको छ ।



यसपटकको फाइनल ब्राजिल विरुद्ध अर्जेन्टिनासँगै दुवै देशका स्टार लिओनेल मेस्सी र नेयमारलाई जोडेर हेरिएको छ । दुवै खेलाडीले जारी प्रतियोगितामा उच्च प्रदर्शन गरेका छन् । मेस्सीले ४ गोल र ५ असिस्ट गर्दै अर्जेन्टिनाको हरेक जितमा प्रभाव छाडेका छन् । नेयमारले पनि २ गोल र ३ असिस्टका साथ आफ्नो उपस्थिति जनाएका छन् ।

मेस्सीले कोपा अमेरिकामा तीन पटक फाइनल खेलेका छन् । सन् २००७ मा पहिलो पटक फाइनल खेलेका उनले ब्राजिलविरुद्ध प्रतिस्पर्धा नै गर्न सकेन । त्यसबेला बाप्टिस्टा र ड्यानी आल्भेससँगै आयलाको आत्मघाती गोलमा ब्राजिल ३-० ले विजयी रहेको थियो ।

सन् २०१५ को कोपा अमेरिका फाइनलमा पनि अर्जेन्टिनाले फाइनलमा स्थान बनायो । त्यसबेला चिलीविरुद्ध गोलरहित बराबरीमा रोकिएपछि खेल टाइब्रेकरमा पुगेको थियो । अर्जेन्टिनाका लागि टाइब्रेकरमा मेस्सीले मात्र पेनाल्टीमा गोल गरेका थिए । गोन्जालो हिगुआइन र एभर बनेगाले पेनाल्टीमा गोल गर्न नसक्दा चिली च्याम्पियन बनेको थियो ।

त्यसको एक वर्षपछि नै कोपा अमेरिकाको शतवार्षिकीको उपलक्ष्यमा आयोजित प्रतियोगितामा इतिहास दोहोरियो । चिलीविरुद्धको फाइनल खेल बराबरीमा सकिएपछि टाइब्रेकरमा खेलको निर्णय हुने भयो । दुर्भाग्यवश यसपटक मेस्सीले पेनाल्टी चुकाउँदा चिली च्याम्पियन बन्यो । मेस्सीले आवेशमा आएर अन्तर्राष्ट्रिय फुटबलबाट संन्यासको घोषणा पनि गरे, तर केहि महिनामा नै आफ्नो निर्णय फिर्ता लिए ।

विश्वकपमा भने मेस्सीले चार पटक राष्ट्रिय टोलीको प्रतिनिधित्व गरेका छन् । सन् २००६ देखि विश्वकप खेल्न थालेका उनले सन् २०१४ मा भने फाइनलसम्म पुगेका थिए । जर्मनीविरुद्ध निकै प्रतिस्पर्धात्मक खेलमा अर्जेन्टिना अतिरिक्त समयमा पराजित हुन पुग्यो । मारियो गोट्जेले १ सय १३ औं मिनेटमा गोल गरेका थिए ।

त्यसअघि सन् २००६ र २०१० मा क्वाटरफाइनलमा रोकिएको अर्जेन्टिनाले सन् २०१८ मा पनि फ्रान्ससँग पराजित हुँदै राउन्ड अफ १६ नै पार गर्न सकेन । अब मेस्सीले २०२२ मा हुने कतार विश्वकप खेल्ने आँकलन गरिएको छ । त्यसअघि शनिबार हुने कोपा फाइनलमा उनलाई पहिलो उपाधि जित्ने अवसर छ ।