काठमाडौं। निर्वाचन आयोगले ७५१ वटा पालिकामा मतगणना सम्पन्न गरेको छ । आयोगले गत वैशाख ३० गते एकसाथ देशभरका ७५३ वटा पालिकामा निर्वाचन गरेको थियो ।
अब देशका २ वटा पालिकाको अन्तिम मतपरिणाम आउन बाँकी रहेको छ । उदयपुरको त्रियुगा नगरपालिकामा मतगणना जारी छ भने बाजुराको बुढीगंगा नगरपालिकामा फेरि मतदान हुने भएको छ ।
आयोगका अनुसार मतगणना सम्पन्न भएका पालिकामा सबैभन्दा बढी प्रमुख तथा अध्यक्ष पद नेपाली कांग्रेसका उम्मेदवारले जितेका छन् । त्यसपछि क्रमसः नेकपा एमाले, नेकपा माओवादी केन्द्र, जनता समाजवादी पार्टी (जसपा), नेपाल, नेकपा (एकीकृत समाजवादी) र लोकतान्त्रिक समाजवादी पार्टी (लोसपा), नेपालले बढी पालिकाको प्रमुख तथा अध्यक्ष जितेका छन् ।
आयोगको पछिल्लो तथ्याङ्कअनुसार मतगणना सम्पन्न भएकामध्ये ३२८ पालिकाको प्रमुख तथा अध्यक्षमा कांग्रेसका उम्मेदवार विजयी बनेका छन् । मतगणना भइरहेकामध्ये १ वटा पालिकाको प्रमुखमा कांग्रेसका उम्मेदवारको अग्रता रहेको छ ।
एमालेका उम्मेदवारले हालसम्म २०५ वटा पालिकाको प्रमुख तथा अध्यक्षमा जित निकालेका छन् । निर्वाचितमध्ये ८२ नगरप्रमुख हुन् भने १२३ गाउँपालिका अध्यक्ष रहेको निर्वाचन आयोगले जनाएको छ ।
माओवादी केन्द्रका उम्मेदवार १२१ पालिकाको प्रमुख तथा अध्यक्षमा विजयी बनेका छन् । माओवादीले २५ नगरप्रमुख जितेको छ भने ९६ गाउँपालिका अध्यक्ष जितेको हो ।
जसपाले हालसम्म ३० वटा पालिकाको प्रमुख तथा अध्यक्ष जितेको छ ।
नेकपा एकीकृत समाजवादीले २० वटा पालिकाको प्रमुख तथा अध्यक्ष जितेको छ । समाजवादीले १ महानगर, एक उपमहानगर र १२ नगरपालिकामा प्रमुख पद जितेको हो भने बाँकी गाउँपालिका अध्यक्ष जितेको हो ।
लोकतान्त्रिक समाजवादी पार्टी (लोसपा)का उम्मेदवारले १६ वटा पालिकाको प्रमुख तथा अध्यक्ष जितेका छन् ।
आयोगका अनुसार अन्य दल र स्वतन्त्र उम्मेदवार ३२ वटा पालिकाको प्रमुख तथा अध्यक्षमा विजयी भइसकेका छन् । काठमाडौं महानगरपालिका, धरान उपमहानगरपालिका, धनगढी उपमहानगरपालिकालगायतको प्रमुखमा स्वतन्त्र उम्मेदवार विजयी भएका हुन् ।
