लन्डन । बेलायतका प्रधानमन्त्री कर स्टार्मरले देशको झण्डालाई हिंसा र धम्कीको प्रतीकको रूपमा प्रयोग गर्ने अति दक्षिणपन्थी प्रदर्शनकारीहरूलाई बेलायतले कहिल्यै ‘आत्मसमर्पण’ नगर्ने बताएका छन्। हालै लन्डनमा भएको दशककै सबैभन्दा ठूलो अति दक्षिणपन्थी प्रदर्शनका क्रममा भएको हिंसाप्रति उनले यस्तो टिप्पणी गरेका हुन्।
शनिबार, एक लाख १० हजारभन्दा बढी मानिसहरूले केन्द्रीय लन्डनमा आप्रवासनको विरोधमा प्रदर्शन गरेका थिए, जसको नेतृत्व अति दक्षिणपन्थी कार्यकर्ता टमी रोबिन्सनले गरेका थिए। यो ‘युनाइट द युनाइटेड किङडम’ नामक र्यालीमा सहभागी केही प्रदर्शनकारीहरू र प्रहरीबीच झडप भएको थियो। मेट्रोपोलिटन प्रहरीका अनुसार, झडपमा २६ प्रहरी अधिकारी घाइते भएका छन् भने २४ जना पक्राउ परेका छन्।
प्रधानमन्त्री स्टार्मरले आइतबार शान्तिपूर्ण प्रदर्शन बेलायतको एक आधारभूत मूल्य भए पनि प्रहरीमाथि भएको आक्रमण र सीमान्तकृत समुदायमाथि भएको दुर्व्यवहारको निन्दा गरेका छन्। “मानिसहरूलाई शान्तिपूर्ण विरोध गर्ने अधिकार छ। यो हाम्रो देशको मूल्यमान्यताको केन्द्र हो,” उनले भने, “तर, हामी आफ्नो काम गरिरहेका प्रहरी अधिकारीमाथि हुने आक्रमण वा मानिसहरूलाई उनीहरूको पृष्ठभूमि वा छालाको रङका कारण सडकमा असुरक्षित महसुस गराउने कुरा सहन सक्दैनौं।”
उनले थपे, “बेलायत गर्वका साथ सहिष्णुता, विविधता र सम्मानमा आधारित राष्ट्र हो। हाम्रो झण्डाले हाम्रो विविध देशको प्रतिनिधित्व गर्छ, र हामी यसलाई हिंसा, डर र विभाजनको प्रतीकको रूपमा प्रयोग गर्नेहरूलाई कहिल्यै आत्मसमर्पण गर्नेछैनौं।”
विदेशी नेताहरूद्वारा उत्तेजक भाषण
शनिबारको प्रदर्शनमा राष्ट्रवादी प्रतीक, झडप र उत्तेजक भाषणहरू थिए। फुटेजहरूमा प्रहरीमाथि बोतल प्रहार गरिएको र प्रदर्शनकारीहरूलाई हटाउन लाठी चार्ज गरिएको देख्न सकिन्छ। प्रदर्शनमा फ्रान्सेली राजनीतिज्ञ एरिक जेम्मोर, बेल्जियमका फिलिप डेविन्टर, डेनिस पीपल्स पार्टीका मोर्टेन मेसरस्मिड, जर्मनका पेट्र बाइस्ट्रोन र पोल्यान्डका डोमिनिक टार्चिन्स्की लगायतका विदेशी नेताहरूले पनि सम्बोधन गरेका थिए।
टेस्लाका सीईओ तथा एक्सका अध्यक्ष एलोन मस्कले पनि भिडियो लिंकमार्फत प्रदर्शनकारीहरूलाई सम्बोधन गर्दै बेलायतलाई ‘सरकारमा तत्काल परिवर्तन’ चाहिएको बताएका थिए।
हालका महिनाहरूमा शरणार्थीहरू बसिरहेका होटेलहरूमा भएका आगजनी लगायतका अति दक्षिणपन्थी हिंसाका घटनाहरू बढेका छन्।
