पूर्वगृहमन्त्री सुधन गुरुङले रास्वपा सरकारले पक्ष-विपक्षी दल नछुटाइ सबैको सम्पत्ति छानबिन गर्ने बताएका छन् । गुरुङले अब वडाध्यक्ष र मेयरको पनि सम्पत्ति छानबिन हुने बताए ।
धादिङस्थित क्रिक रिसोर्टमा अन्तरक्रियामा गुरुङले भने, ‘हाम्रो सरकारले पक्ष र विपक्ष भन्ने कुरामा त छुटाउँदैन नि त । गलतलाई गलत नै भन्दिन्छन्, होइन ? त्यही भएको हिसाबले पनि बुझ्नुभएको छैन कि उहाँहरूको सम्पत्ति छानबिन हुँदैछ । सुनको तोला-तोला जोख्छन् । छिट्टै बुझ्छन् । उहाँहरूलाई त्यतिखेर चाहिँ ओहो ठूलै गल्ती गरिएछ कि क्या हो भनेर बल्ल थाहा हुन्छ ।
आफ्नै उदाहरण दिँदै उनले भने-‘मेरो आफ्नै त भइरहेको छ भनेपछि आफ्नै सरकारले आफ्नै विपक्षी दलको मान्छे जस्तो गरेर, यत्रो हामीले आन्दोलन गरेर यहाँसम्म सरकारलाई ल्यायौँ, होइन ? तैपनि फर्स्टमै अट्याक मलाई !’
कोही पनि दूधले धोएको नहुने भन्दै गुरुङले भोलि रास्वपाकै मेयरलाई पनि छुने गरी नीति बनाउने बताए । ‘हामी सबैजना दूधले धोएको त, गङ्गामा नुहाएर आएको त कोही पनि छैन होला । सबैजनाको केही न केही त हुन्छ होला । कसै न कसैको गल्ती हुन्छ, कसैलाई लोभ हुन्छ, कसैलाई आज राम्रो छ भोलि नराम्रो हुन सक्छ’, गुरुङले थपे, ‘त्यही हिसाबले हामीले नीति-नियम बनाइदियौँ भने जो कोहीलाई पनि त्यही लागू हुने भयो । त्यही लुपहोलमा फेरि अर्को हाम्रो रास्वपाको मेयर आयो भने त तपाईं र हाम्रो नाक त काटियो नि ! समात्न त पर्छ फेरि हामीले त। रास्वपा भनेर छोड्ने कुरा त हुँदैन नि !’
