नेपाली कांग्रेसको सोमबार बिहान ११ बजेका लागि बोलाइएको संसदीय बोर्डको बैठक अझै बस्न सकेको छैन ।
प्रवक्ता देवराज चालिसेले पार्टीका तर्फबाट केही स्थानमा उम्मेदवारहरू टुङ्गिए पनि संसदीय बोर्डको औपचारिक बैठक बसि नसकेकाले सार्वजनिक नभएको जानकारी दिए ।
रणनीतिक स्थानहरूमा बाहेक उम्मेदवारहरू तय भइसकेका छन् तर संसदीय बोर्डको बैठक बसेर औपचारिक निर्णय गर्न बाँकी रहेकाले सार्वजनिक गर्न मिलेको छैन प्रवक्ता चालिसेले भने ।
उनका अनुसार केही उम्मेदवारहरूले टिकट लगेर गए पनि संसदीय बोर्डबाट औपचारिक निर्णय हुन बाँकी नै छ। शीर्ष तहका नेताहरू चुनाव लड्ने र रणनीतिक महत्वका २०/२२ सिट भने मंगलबार बिहानसम्म सन्तुलन मिलाउनका लागि राखिने प्रवक्ता चालिसेले बताए ।
राष्ट्रिय स्वतन्त्र पार्टीकी निवर्तमान सांसद सुमना श्रेष्ठ नेपाली कांग्रेसमा आएर निर्वाचन लड्ने हो भन्ने प्रश्नमा प्रवक्ता चालिसेले भने संसदीय बोर्डले निर्णय नगर्दासम्म मैले औपचारिक रूपमा भन्न मिल्दैन तर यति बुझ्नुस् कांग्रेसले केही नयाँ गर्छ।
स्रोतका अनुसार श्रेष्ठलाई कांग्रेसले काठमाडौँ १ या ४ बाट उम्मेदवार बनाउने तयारी गरिरहेको छ। त्यस्तै कांग्रेसका नेताहरूले जेनजी अभियन्ता रक्षा बमसँग पनि उम्मेदवारीको विषयमा कुराकानी गरिरहेका स्रोतले बताएको छ ।
