साउन २५ गते विधान महाधिवेशन गर्ने एमालेको निर्णय

  • Published Date : 2021-07-04
  • nepaltale.com

काठमाडौं। नेकपा एमालेले आगामी साउन २५ गते विधान अधिवेशन गर्ने भएको छ।

पार्टी अध्यक्ष एंवम् प्रधानमन्त्री केपी शर्मा ओलीले सरकारी निवास वालुवाटारमा शुक्रबार र सनिबार बसेको १३ औ केन्द्रीय समिति बैठकले अगामी साउन २५, २६ र २७ गते काठमाण्डौमा विधान अधिवेशन गर्ने निर्णय गरेको हो।



विधान अधिवेशनमा पार्टी अध्यक्षको संयोजकत्वमा राजनीतिक प्रतिवेदन, महासचिवको संयोजकत्वमा संगठनात्मक प्रस्ताव, संगठन विभाग प्रमुखको संयोजकत्वमा विधान संसोधन प्रस्ताव र नेता रामबहादुर थापाको संयोजत्वमा व्यवस्थापन समिति गठन गर्ने निर्णय पनि भएको प्रचार विभाग उपप्रमुख सूर्य थापाले जानकारी दिए।

असार ५ गते भित्र पार्टीको सदस्यता नविकरण गरि साउन ५ गते त्यसको अभिलेख पार्टी केन्द्रीय कार्यालयमा पठाईसक्न पनि बैठकले निर्देशन दिएको छ।

त्यसैगरी पार्टीका तल्लो तहका कमिटीहरुको अधिवेशन अन्र्तगत आगामी भदौ ५ गते वडास्तरका र १५ गते पालिकास्तरका अधिवेशनहरु गर्ने निर्णय बैठकले गरेको छ।

त्यसैगरी पार्टीका केन्द्रीय तहका ३२ वटा विभागमा रहने सदस्यहरुको प्रस्ताव र सिफारिस अबिलम्ब पठाउन बैठकले निर्देश गरेको प्रचार विभाग उपप्रमुख थापाले बताए।

उनले भने “बैठकले संगठनको काममा केन्द्रीत हुन सबै कार्यकर्तालाई निर्देशन दिएको छ । बैठकमा महासचिवले ५ बुँदे संगठनात्मक योजना प्रस्तुत गर्नुभएको थियो। जसमा असार ५ गते भित्र पार्टीको सदस्यता नविकरण गरिसक्नुपर्ने र साउन ५ गते त्यसको अभिलेख पार्टी केन्द्रीय कार्यालयमा पठाईसक्नुपर्ने छ।केन्द्रीय कमिटीको आगामी साउन २५ र २७ गते सम्म पार्टीको विधान अधिवशन काठमाण्डौमा गर्ने , पार्टी अध्यक्षको संयोजकत्वमा राजनीतिक प्रतिवेदन,महासचिवको संयोजकत्वमा संगठनात्मक प्रस्ताव, संगठन विभाग प्रमुखको संयोजकत्वमा विधान संसोधन प्रस्ताव र रामबहादुर थापाको संयोजत्वमा व्यवस्थापन समिति गठन गर्ने , पार्टीका तल्लो तहका कमिटीहरुको अधिवेशन अन्र्तगत आगामी भदौ ५ गते वडास्तरका र १५ गते पालिकास्तरका अधिवेशनहरु गर्ने प्रस्ताव गर्नुभएको छ। पार्टीका केन्द्रीय तहका ३२ वटा विभागमा रहने सदस्यहरुको नाम प्रस्तावित गर्न यसअघि नै पार्टीले जारी गरेको अपानी अनुरुप पार्टी महासचिवले पत्राचार समेत गर्नुभएको थियो। त्यसमा मागिएको सबै प्रस्ताव र सिफारिस आईसकेको छैन अबिलम्ब पठाउन भनिएको छ। स्थायी समितिको आगामी बैठकले विभागमा रहने सदस्यहरुको नामावलीलाई अन्तिम रुपमा निर्णय गर्ने गरि प्रस्ताव गरिएको छ। अर्को सिंगो मुलुक निर्वाचनको तयारीमा जुट्न निर्देशन दिएको छ। यी ५ वटै बुँदालाई केन्द्रीय कमिटीमा घनीभूत छलफल भएर सुझाव सर्वसम्मतिले पारित गरेको छ। संगठनात्मक कामको योजनालाई पारित गरेको छ।”

बैठकले संगठनको काममा केन्द्रीत हुन सबै कार्यकर्तालाई निर्देशन दिएको छ।

बैठकमा अध्यक्ष एवंम् प्रधानमन्त्री ओलीले विपक्षी गठबन्धनको भ्रम बारेमा स्पष्ट पारेका थिए।

नेकपा एमाले विरुद्ध मोर्चाबन्दी गरिएको भन्दै उनले पार्टीका नेता कार्यकर्तालाई सच्चिएर फर्किन आव्हान गरेका छन्।

अध्यक्ष ओलीले अर्को बैठक सर्वोच्च अदालतले प्रतिनिधिसभा विघटन गरेको भोलीपल्ट काठमाण्डौमा बस्ने गरि सुचना आउने जानकारी पनि बैठकलाई गराएको थापाले बताए।

उनले भने “बैठकमा पार्टी अध्यक्षले स्पष्ट रुपमा के भन्नुभएको छ भने, पार्टीको १४ औ बैठक अर्थात् आगामी बैठक सर्वोच्च अदालतले प्रतिनिधिसभा विघटन गरेको भोलीपल्ट काठमाण्डौमा बस्ने गरि सुचना आउने छ।”

प्रधानमन्त्री ओलीले अहिले विपक्षी मोर्चामा सामेल भएकालाई सर्वोच्च अदालतको फैसला आउनु अघि नै सच्चिएर आउन आग्रह पनि गर्नुभएको प्रचार विभाग उपप्रमुख थापाले जानकारी दिए।