काठमाडौँ । प्रधानमन्त्री केपी शर्मा ओलीको भारत भ्रमणको चर्चा सुरु भएसँगै दुई देशबिच रहेका संयन्त्र सक्रिय हुन थालेका छन् ।
भारत भ्रमणको चर्चा सुरु हुने बित्तिकै ९ वर्षदेखि बस्न नसकेको गृहसचिवस्तरीय संयन्त्रको बैठक गत साता भारतको राजधानी दिल्लीमा बसेको थियो । सन् २०१६ यता यसको बैठक बस्न सकेको थिएन । बैठकले विभिन्न महत्त्वपूर्ण निर्णयहरू गरेको बताइएको छ ।
त्यस्तै साउन १२–१३ गते नेपाल–भारत सीमा कार्यदलको बैठक बस्यो । भारतका प्रधानमन्त्री नरेन्द्र मोदी पहिलो पटक नेपाल भ्रमणमा आएका वेला सन् २०१४ मा गठन गरिएको उक्त कार्यदलको बैठक ६ वर्षपछि (यसअघि सन् २०१९ मा पछिल्लो पटक यसको बैठक बसेको थियो) बसेको हो । जबकि हरेक दुई–दुई वर्षमा यस्तो बैठक बस्नुपर्ने थियो ।
प्रधानमन्त्री भारत भ्रमणमा जानुअघि सर्वेक्षण अधिकारीसहितको अर्को बैठक अगस्टमा नेपालमा बस्ने परराष्ट्र मन्त्रालयले जनाएको छ ।
ओलीको भ्रमणअघि बसेका यी महत्त्वपूर्ण दुईटा बैठकलाई कूटनीतिक क्षेत्रमा चासोपूर्वक हेरिएको छ । यी दुइटै बैठकमा सीमा क्षेत्र र सीमा सुरक्षाको विषयमा छलफल भएको थियो । जुन दुई देशको सबैभन्दा चासोको विषय हो ।
नेपालले लिम्पियाधुरा, कालापानी र लिपुलेकलाई समेटेर नयाँ नक्सा नै जारी गरेको थियो । यसप्रति भारतले निको मानेको छैन । यही विषय दुई देशबिच अझै विवादको रूपमा रहँदै आएको छ ।
